Дирекцијата за задолжителни резерви на нафта и нафтени деривати е основана со Законот за задолжителни резерви на нафта и нафтени деривати („Службен весник на Република Македонија“ бр. 84/08, 35/11, 84/12, 43/14 и 83/18).
Дирекцијата е орган на државната управа кој е единствено надлежен и овластен за формирање, одржување, чување и продажба на задолжителните резерви на нафта и нафтени деривати на Република Северна Македонија. Дирекцијата за својата работа одговара пред Владата на Република Северна Македонија.
Задолжителните нафтени резерви се формираат со цел Република Северна Македонија да обезбеди високо ниво на сигурност и безбедност во снабдувањето со сурова нафта и/или нафтени деривати, односно за обезбедување на услови за интервентно снабдување на пазарот со нафта и нафтени деривати, во случај на нарушување на енергетската сигурност на државата предизвикана од пореметувања во снабдувањето со нафтени деривати од поголеми размери.
Со цел да се изврши усогласување на македонското законодавство со законодавството на Европската Унија во сегментот на безбедноста во снабдувањето, односно заради усогласување со Директивите на ЕУ кои ги обврзуваат земјите членки да одржуваат минимални залихи на сурова нафта и/или нафтени деривати, што е битна претпоставка во процесот на пристапување на Република Северна Македонија кон ЕУ, беше донесен Законот за задолжителни резерви на нафта и нафтени деривати во кој е извршено транспонирање на Одлуката 68/414/ЕЕЗ и Директивите 73/238/ЕЕЗ и 2006/67/ЕЗ. Овој закон отпочна да се применува сметано од 2009 година и истиот се очекува да биде во примена до 31.12.2018 година.
Со оглед дека Советот на ЕУ во 2009 година донесе нова директива за нафтени резерви, Република Северна Македонија повторно изврши усогласување со европското законодавство при што изврши транспонирање на Директивата 2009/119/ЕУ во новиот Закон за задолжителни нафтени резерви („Службен весник на Република Македонија“ бр. 144/14, 178/14, 199/15 и 197/17). Овој закон треба да отпочне да се применува сметано од 01.01.2019 година.
Формирањето, чувањето, обновувањето и користењето на задолжителни резерви се однесува за еден или повеќе од следните видови производи:
– сурова нафта;
– сите видови моторни и авио бензини;
– сите видови дизел гориво и керозин;
– ЕЛ – масло за домаќинство;
– ТНГ;
– мазут.
Надлежности
Дирекцијата ги врши следните работи:
- формирање, чување, обновување, зановување и користење на задолжителните резерви на нафта и нафтени деривати;
- купување и продажба на нафта и нафтени деривати со цел формирање и обновување на задолжителните резерви;
- пресметување на нивото на залихи на задолжителните резерви врз основа на податоци од референтната година ;
- водење на евиденција за нивото и видот на залихите на задолжителни резерви;
- осигурување на залихите на задолжителни резерви од ризици;
- предлагање начин за утврдување, пресметување, висина и уплатување на надоместокот за задолжителните резерви на нафта и нафтени деривати што се плаќа при увоз како и при промет на нафтени деривати од домашно производство;
- прибирање на надоместокот за задолжителни резерви на нафта и нафтени деривати;
- грижа за наменско трошење на средствата за формирање и складирање на задолжителните резерви;
- предлагање начин за утврдување, пресметување и плаќање на трошоците во врска со складирањето, чувањето и одржувањето на задолжителните резерви на нафта и нафтени деривати;
- предлагање начин и постапка за користење, физичка достапност и расположливост на задолжителните резерви во случај на нарушување на енергетската сигурност на државата предизвикана од пореметувања во снабдувањето од поголеми размери;
- предлагање на мерки за ублажување на последиците кои се резултат на потешкотии во снабдувањето со нафта и нафтени деривати;
- утврдување на условите за складирање на задолжителните резерви преку следење на расположливост на складишните капацитети;
- изградба на нови складишни капацитети и одржување на постоечките;
- изготвување на регистар на залихи на задолжителните резерви во случај на нарушување на енергетската сигурност на државата предизвикана од пореметувања во снабдувањето од поголеми размери;
- склучување на договори за складирање на задолжителните резерви и нивно евидентирање;
- надзор и управување со задолжитените резерви;
- надзор над спроведување на одредбите од Законот за задолжителни резерви на нафта и нафтени деривати и
- други работи во согласност со закон.
Управување и раководење
Со Дирекцијата управува Управен одбор, кој се состои од пет члена. Членовите на Управниот одбор на Дирекцијата ги именува Владата на Република Северна Македонија. Три члена на Управниот одбор се именуваат на предлог на министерот надлежен за работите од областа на енергетиката од редот на реномирани и истакнати стручни лица и експерти во земјата од областа на нафтените деривати. Еден член се именува на предлог на министерот надлежен за работите од областа на финансиите и еден член се именува на предлог на Регулаторната комисија за енергетика на Република Северна Македонија.
Членови на Управниот одбор се:
1.Исмаил Љума – Претседател
2.Фросина Трајковиќ – заменик претседател
3.Вјолца Ејупи – член
4.Душко Тасев – член
5.Дашурим Дани – член
Со Дирекцијата раководи директор кој го именува и разрешува Владата на Република Северна Македонија.
Директор на Дирекцијата е Уљуси Бекири.
Органограм
НА ВНАТРЕШНАТА ОРГАНИЗАЦИЈА НА
ДИРЕКЦИЈАТА ЗА ЗАДОЛЖИТЕЛНИ РЕЗЕРВИ НА НАФТА И НАФТЕНИ ДЕРИВАТИ
(ДЗРННД)
Листа на вработени во ДЗРННД